世界盃嚟緊星期五開鑼，一直打到 7月 12號，股王 A話，呢段時間冇人炒股，所以休戰一個月睇波。平日股票投資當然可以休戰，但打工仔每月供強積金，呢項投資就冇得停。
同樣關乎強積金，中銀保誠上個禮拜宣佈，減基金管理費迎積金半自由行，相信遲啲會陸續有受託人加入減價行列，尤其市佔率高嘅，憑着規模效益，減起上嚟相信會好狠。
受託人減價可以令打工仔更關注自己份強積金，因為一講到減價，大家都唔會執輸，反而平日大家對積金投資就唔係咁貼市。好似之前有報道，歐洲債務危機整冧個市，再拖累強積金回報。唔少打工仔家陣先諗，使唔使轉吓個投資組合避險。
可能係受理財專家潛而默化影響，認為月供強積金係利用平均成本法，拉勻入市價，降低風險，只要睇長線，就唔使成日轉 portfolio，避免高買低沽。
未必可拉低買入成本
其實平均成本法唔一定拉低買入成本，經濟起跌周而復始，如果喺升浪時開始供款，到跌浪時退休，即使以平均成本法買貨，但全部升市時貴買，即使臨尾幾年市跌令到用同樣金額買多啲貨，都唔足以「溝淡」之前買落嘅貴貨。
敏妮有個朋友，曾經做過一個統計，同樣定額投資，但只喺恒指市盈率低於某個百分比時先入市，結果有更好風險回報。假設以相關性啱啱相反嘅投資產品作入市選擇，好似股市跌通常債券升，再用朋友嘅入市策略做藍本，睇吓當時邊類投資產品市盈率低先買入。好似去 supermarket入貨，嗰期邊隻貨做特價先買，回報可能比單靠平均成本法高。當然，如果隻貨已經過期兼壞咗，就更便宜都唔應該買。
理論係咁，仲要試下可否實踐同成效如何。講到尾，投資無論短中長線，都要貼市隨時做好部署，邊可以蹺埋手，用梗一套策略就食糊！
